కాలం లేని నిత్యత (Eternity) — భౌతిక శాస్త్రం చెబుతున్న శాశ్వత సత్యం

 # కాలం లేని నిత్యత (Eternity) — భౌతిక శాస్త్రం చెబుతున్న శాశ్వత సత్యం

Dr. B.S. Chakravarthy 17/02/2026

మనము ఇప్పుడే జీవిస్తున్నామా?

లేదా మన జననం, మన మరణం, డైనోసార్‌ల కాలం, విశ్వాంతం — ఇవన్నీ ఒకేసారి ఇప్పటికే ఉన్నాయా?

ఇది ఒక తాత్విక ప్రశ్నలా అనిపించవచ్చు.

కానీ ఆధునిక భౌతిక శాస్త్రం నిశ్శబ్దంగా ఒక ఆశ్చర్యకరమైన విషయాన్ని సూచిస్తోంది:

కాలం ప్రవహించదు. అది మన మనస్సు సృష్టించిన ఒక భ్రమ కావచ్చు.

నిత్యతను అర్థం చేసుకోవాలంటే ముందుగా కాలాన్ని అర్థం చేసుకోవాలి.

ఆ తరువాత కాలం లేకుండా ఆలోచించడం నేర్చుకోవాలి.

## భవిష్యత్తు గురించి ఆలోచింపజేసే గడియారం

ఒక కొండలో లోతుగా ఒక భారీ యాంత్రిక గడియారం నిర్మించారు.

ఇది ప్రతి వెయ్యేళ్లకు ఒకసారి మాత్రమే మోగుతుంది.

ఇది 10,000 సంవత్సరాలు పనిచేయడానికి రూపకల్పన చేయబడింది.

విద్యుత్ లేకుండా, సూర్యశక్తి, బరువులు, గియర్లు సహాయంతో ఇది నడుస్తుంది.

మనుషులు లేకపోయినా ఇది పనిచేస్తూనే ఉంటుంది.

ఈ గడియారాన్ని రూపొందించిన డానీ హిల్లిస్ అనే శాస్త్రవేత్త లక్ష్యం ఒకటే:

మనిషి భవిష్యత్తును వేల సంవత్సరాల పరిమాణంలో ఆలోచించాలి.

మనము గతాన్ని గుర్తుచేసే స్మారక చిహ్నాలు నిర్మించాం.

కానీ భవిష్యత్తును ఊహించే చిహ్నాలు నిర్మించలేదు.

నిత్యత అంటే ఏమిటి?

అనంతమైన కాలమా?

లేక కాలం లేకపోవడమా?

## ఊహించలేని సంఖ్యలు, కాల పరిమాణాలు

భౌతిక శాస్త్రంలో కొన్ని కాల పరిమాణాలు అంత పెద్దవి, అవి నిత్యతతో సమానంగా అనిపిస్తాయి.

వాటిలో ఒకటి *పోయంకారే రికరెన్స్ టైమ్*.

సాధారణంగా చెప్పాలంటే —

విశ్వంలోని అణువులు పరిమిత సంఖ్యలో మాత్రమే అమరికలు పొందగలవు.

అవి నిరంతరం మారుతూ ఉంటే, ఎప్పటికైనా మళ్లీ మొదటి స్థితికి చేరుకోవచ్చు.

అది అనంత కాలం అవసరం కాదు —

కేవలం ఊహించలేని పెద్ద కానీ పరిమిత కాలం చాలు.

గణితంలో ఒక “ట్రీ గేమ్” ఉంది.

మూడే రకాల బీజాలతో చెట్లు గీయడం మొదలుపెడితే,

ఆ గేమ్ ముగియడానికి అవసరమైన చెట్ల సంఖ్య

మొత్తం విశ్వంలో వ్రాయలేనంత పెద్దది.

ప్లాంక్ టైమ్ అనే అత్యల్ప కాలంలో ఒక్కో చెట్టు గీసినా,

నక్షత్రాలు ఆరిపోయినా, గెలాక్సీలు నశించినా,

బ్లాక్ హోల్స్ ఆవిరైపోయినా —

ఆ గేమ్ ఇంకా ముగియదు.

ఇంత పెద్ద సంఖ్యలు కూడా చివరికి పరిమితమే.

అంటే అనంతం కూడా గణనీయమైనదే కావచ్చు.

## చక్రంలా తిరిగే విశ్వం?

కొన్ని సిద్ధాంతాల ప్రకారం విశ్వం విస్తరించి, కుంచించుకొని, మళ్లీ పుడుతూ ఉండవచ్చు.

జేమ్స్ వెబ్ టెలిస్కోప్ గమనించిన మొదటి గెలాక్సీలు

అనుకున్నదానికంటే ముందే ఏర్పడ్డాయి.

ఇది గత విశ్వాల అవశేషాలు కొత్త విశ్వానికి విత్తనాలై ఉండవచ్చని సూచిస్తుంది.

అలా అయితే —

నిత్యత ఒక సూటి రేఖ కాదు.

ఒక వలయం.

## కాలం లేకుండా నిత్యత

భౌతిక శాస్త్రం లోతుల్లోకి వెళ్తే

కాలం అనే భావనే మాయమవుతుంది.

ఐన్‌స్టీన్ చెప్పినట్లుగా

భూతం, వర్తమానం, భవిష్యత్తు — ఇవన్నీ ఒక స్థిరమైన భ్రమ మాత్రమే.

సాపేక్ష సిద్ధాంతం ప్రకారం

ప్రపంచంలో ఒకే “ఇప్పుడు” అనే క్షణం లేదు.

మార్స్‌పై ఏమి జరుగుతుందో మనకు ఇప్పుడే తెలియదు.

అది 20 నిమిషాల క్రితం ఎలా ఉందో మాత్రమే చూస్తాం.

అంటే మనం ఎప్పుడూ గతాన్నే చూస్తున్నాం.

ప్రతి వ్యక్తి తన స్వంత సమయ బుడగలోనే జీవిస్తున్నాడు.

అంటే గతించిన కాలాన్నే వర్తమానంగా భావించి జీవిస్తున్నాడు.

## ఒకే సమయ-స్థల బ్లాక్(Fixed block universe) 

భౌతిక శాస్త్రంలో ఒక భావన ఉంది — ఎటర్నలిజం.

దాని ప్రకారం విశ్వం ఒక సమగ్ర స్థిర బ్లాక్‌లా ఉంటుంది.

అందులో

మన జననం

మన వృద్ధాప్యం

డైనోసార్లు

విశ్వాంతం

అన్నీ ఇప్పటికే ఉన్నాయి.

సినిమా రీల్‌లా.

ప్రతి ఫ్రేమ్ ఇప్పటికే ఉంది.

మనము వాటిని లీనియర్‌గా అనుభవిస్తున్నాము అంతే.

కాలం ప్రవహించడం కాదు —

మనము కాలంలో ఒక బిందువు నుంచి మరో బిందువుకు కదులుతున్నాం.

## కదలిక కూడా ఒక భ్రమ?

ప్రతి క్షణంలో ఒక వస్తువు ఒకే స్థానంలో ఉంటుంది.

అప్పుడు అది కదులుతుందా?

లేదా కదలిక మన perception వల్లా?

క్వాంటం ప్రయోగాల్లో

ఒక కణాన్ని నిరంతరం పరిశీలిస్తే

దాని మార్పు నెమ్మదిస్తుంది.

కొన్నిసార్లు ఆగిపోతుంది.( quantum zeno effect) 

అంటే పరిశీలన కాలాన్ని “స్థంభింపజేస్తుంది”.

కాలం నిరంతర ప్రవాహం కాకపోవచ్చు.

అది చిన్న చిన్న ఫ్రేమ్‌ల సమాహారం కావచ్చు.

## ఆది, అంతం, ప్రశ్న

విశ్వాన్ని వెనక్కి అనుసరిస్తే

ఒక సింగ్యులారిటీకి చేరుకుంటాం.

అంటే అంతకన్నా మునుపు ఉండదు —

జీరో టైమ్, జీరో స్పేస్ కల ఒక నిశ్చల స్థితి.

అక్కడ మన గణితం పనిచేయదు.

అక్కడ “ముందు ఏముంది?” అనే ప్రశ్నకే అర్థం ఉండకపోవచ్చు.

ఐన్‌స్టీన్ సాపేక్ష సిద్ధాంతం చెబుతుంది:

కాలం, స్థలం కలిసి ఒకటే.

కాలం లేకుండా విశ్వాన్ని ఊహించగలమా?

బహుశా అదే నిత్యత.

## *మన అనుభవం*

మన జీవితాలు కాలంపై ఆధారపడి ఉన్నాయి.

జ్ఞాపకాలు, ఆశలు, ప్రణాళికలు — అన్నీ కాలంతో.

కానీ భౌతిక శాస్త్రం చెబుతోంది:

అన్ని సంఘటనలు ఒకేసారి ఉన్నాయి.

మనము ఒక సినిమా పాత్రలలా

ఒక ఫ్రేమ్ నుంచి మరో ఫ్రేమ్‌కి ప్రయాణిస్తున్నాము.

నిత్యత అంటే

అనంతమైన కాలం కాదు.

కాలం లేకపోవడం. ఒక నిశ్చల స్థితి.

అన్నీ ఒకేసారి ఉండే స్థితి.

కంప్లీట్ స్టిల్‌నెస్.

ఈ స్టిల్‌నెస్‌లోనే వెల్‌నెస్ ఉంది.

మనం దానిలోనే జీవిస్తున్నాం —

ప్రతి క్షణం, ఎప్పటికీ,

శాశ్వతంగా, నిత్యనూతనంగా.

మన ఆలోచనలు కాలాన్ని అనుసరిస్తాయి.

అవి నిశ్చల స్థితికి వ్యతిరేకం.

కానీ ఎటర్నిటీలో కాలం ఒక భ్రమ.

అందువలన మానవ మనస్సు ఈ నిత్యతను పూర్తిగా అనుభవించడం కష్టం.

ఆలోచనల్ని కాలం నుంచి వేరుచేసి

ఆ నిశ్చల, నిర్మల, శాశ్వత స్థితిని అనుభవించగలిగితే

విశ్వంతో తాదాత్మ్యం పొందగలుగుతాం.

బహుశా ఈ నిరంతర నిర్మలస్థితినే మోక్ష స్థితి అని భావించవచ్చు —

ఇది రచయిత అభిప్రాయం.